Ուժգին Պայթում Մը Ցնցեց Հարաւային Արուարձանները` Խախտելով Լիբանանի Ապահովական Կայունութիւնը
Երեքշաբթի 9 յուլիս առարօտեան ժամը 11:00-ին, ուժգին պայթում մը ցնցեց Պէյրութի Հարաւային
արուարձանները` պատճառելով 54 վիրաւոր եւ նիւթական հսկայական վնասներ: Հարաւային արուարձաններուն
պայթումը պատահեցաւ խիտ բնակչութիւն ունեցող Պիր Ապըտ շրջանին մէջ: Պիր Ապըտը թիրախ
դարձնողը նոյն շրջանին մէջ գտնուող «Քարտ Հասան» կառատան մէջ «Նիսան 4×4» տիպի ականուած
ինքնաշարժ մըն էր: Ականուած այս ինքնաշարժը պայթած էր Իսլամական համագործակցութեան կեդրոնին
կից: Ապահովական ուժերուն բացած հետաքննութեան նախնական արդիւնքներուն համաձայն, ականը
35 քիլոկրամ պայթուցիկ նիւթ կը կրէր: Ռամատանի առաջին օրուան ընթացքին կատարուած այս
ոճրային արարքին նպատակն էր կարելի եղածին չափ մեծ թիւով մարդկային վնասներ պատճառել: Պայթումը
պատճառեց նաեւ նիւթական մեծ վնասներ` շրջանին մէջ գտնուող շէնքերուն եւ վաճառատուներուն,
ինչպէս նաեւ նոյն կառատան մէջ գտնուող ինքնաշարժներուն պարագային: Դէպքին վայրը փութացին
բանակն ու ներքին ապահովութեան ուժերը, որոնք շրջափակեցին շրջանը եւ քաղաքացիներէն պահանջեցին
ուղղուիլ իրենց բնակարանները: Ներքին գործոց նախարարի պաշտօնակատար Մարուան Շարպել
ուղղուեցաւ դէպքին վայրը: Շարպել դատապարտեց գործուած պայթումը` ընդգծելով հետաքննութեան
կարեւորութիւնը` քողազերծելու համար պայթումին ծալքերը: